പ്രദേശത്തെ മാനുഷിക സാഹചര്യം ഇപ്പോൾ വളരെ മോശമാണെന്നും യഥാർത്ഥ ക്ഷാമത്തിന്റെ ഘട്ടത്തിൽ എത്തിയെന്നും ഗാസയിലെ ആരോഗ്യ മന്ത്രാലയം പറഞ്ഞു. ഭക്ഷണത്തിന്റെ കടുത്ത ക്ഷാമം നിലനിൽക്കുന്നു. നിരവധി ആളുകൾ പോഷകാഹാരക്കുറവ് അനുഭവിക്കുന്നു. ആശുപത്രികൾക്ക് ശരിയായ ആരോഗ്യ സംരക്ഷണം നൽകാൻ കഴിയുന്നില്ലെന്നും അവർ വ്യക്തമാക്കി.
ക്ഷാമവും സഹായ കേന്ദ്രങ്ങൾക്ക് സമീപമുള്ള അക്രമാസക്തമായ ആക്രമണങ്ങളും ആയിരക്കണക്കിന് ആളുകളുടെ ജീവൻ ഗുരുതരമായ അപകടത്തിലേക്ക് പോവുകയാണെന്നും അവർ മുന്നറിയിപ്പ് നൽകി.
ഖാൻ യൂനിസിലെ നാസർ മെഡിക്കൽ കോംപ്ലക്‌സിൽ പുലർച്ചെ മുതൽ 32 മൃതദേഹങ്ങൾ ലഭിച്ചതായും നിരവധി പേർക്ക് പരിക്കേറ്റതായും മന്ത്രാലയം റിപ്പോർട്ട് ചെയ്‌തു. തെക്കൻ ഗാസയിൽ സഹായത്തിനായി കാത്തിരിക്കുകയായിരുന്ന പൗരന്മാർക്ക് നേരെ ഇസ്രായേൽ നടത്തിയ ആക്രമണമാണ് ഇതിന് കാരണം.
കൊലപാതകങ്ങൾ തടയുന്നതിനും ഭക്ഷണം, മരുന്ന്, ഇന്ധനം എന്നിവ പതിവായി എത്തിക്കുന്നതിന് സുരക്ഷിതമായ വഴികൾ തുറക്കുന്നതിനും അന്താരാഷ്ട്ര സമൂഹത്തോടും ഐക്യരാഷ്ട്ര സഭയോടും മനുഷ്യാവകാശ ഗ്രൂപ്പുകളോടും അടിയന്തര നടപടി സ്വീകരിക്കണമെന്ന് മന്ത്രാലയം ആവശ്യപ്പെട്ടു.
